रास्वपाका सभापति रवि लामिछानेद्वारा भाजपाको शीर्ष नेतृत्वसँग भेटवार्ता

काठमाडौँ, जेठ १९ । राष्ट्रिय स्वतन्त्र पार्टी (रास्वपा) का सभापति रवि लामिछाने नेतृत्वको प्रतिनिधिमण्डलले भारतको नयाँ दिल्लीस्थित भारतीय जनता पार्टी (भाजपा) को केन्द्रीय कार्यालयमा भाजपाको शीर्ष नेतृत्वसँग राजनीतिक तथा कूटनीतिक भेटवार्ता गरेको छ।
रास्वपाले सामाजिक सञ्जालमार्फत सार्वजनिक गरेको जानकारीअनुसार सभापति लामिछानेको नेतृत्वमा सहमहामन्त्री विपिन कुमार आचार्य, सचिवालय सदस्य दीपक बोहरा लगायतको उच्चस्तरीय प्रतिनिधिमण्डलले भाजपाका राष्ट्रिय अध्यक्ष नितिन नवीन, महासचिव अरुण सिंह, विदेश विभाग प्रमुख विजय चौथाइवाले तथा रेखा गुप्ता लगायत वरिष्ठ नेताहरूसँग छलफल गरेको हो।
द्विपक्षीय छलफलका क्रममा नेपाल र भारतबीचको ऐतिहासिक, सांस्कृतिक तथा जनस्तरको सम्बन्धलाई समयानुकूल थप सुदृढ बनाउने, लोकतान्त्रिक मूल्य–मान्यता र अभ्यासबारे संवाद विस्तार गर्ने विषयमा विचार आदानप्रदान भएको रास्वपाले जनाएको छ।
भेटवार्तामा सुदृढ संगठन निर्माण, तल्लो तहसम्म जनसम्पर्क विस्तार, विकासमुखी सुशासन तथा समकालीन राजनीतिमा नयाँ पुस्ताको नेतृत्वदायी भूमिकासम्बन्धी अनुभव र रणनीतिबारे पनि छलफल भएको बताइएको छ।
रास्वपाका अनुसार उक्त भेटले दुई दलबीचको आपसी समझदारीलाई थप मजबुत बनाउनुका साथै पार्टीको संगठनात्मक सुदृढीकरण र लोकतान्त्रिक परिपक्वता अभिवृद्धिमा योगदान पुग्ने अपेक्षा गरिएको छ।