श्रम संस्कृति पार्टीका अध्यक्ष हर्क साम्पाङ्को संवैधानिक परिषद अध्यादेश र प्रधानन्यायाधीश नियुक्तिमा आपत्ति

काठमाडौं, वैशाख २५ । श्रम संस्कृति पार्टीका अध्यक्ष एवं सुनसरी–१ का सांसद हर्कराज राई (हर्क साम्पाङ्)ले संसद छलेर राष्ट्र प्रमुखमार्फत संवैधानिक परिषदसम्बन्धी अध्यादेश जारी गराउनु गलत भएको बताएका छन्।

एक विज्ञप्तिमार्फत उनले वरियताको क्रम उल्लङ्घन गरी चौथो वरियताका व्यक्तिलाई प्रधानन्यायाधीश नियुक्त गर्नु अर्को ठूलो गल्ती भएको आरोप लगाएका छन्। “गलत कार्यलाई कदापि सही भन्न सकिन्न र भन्न हुँदैन,” उनले भनेका छन्।

राईले सहकारी ठगी प्रकरण र भदौ २३–२४ को जेन जेड आन्दोलनजस्ता विषयमा सरकार आफ्नो पक्षमा निर्णय गराउनका लागि यो नियुक्ति दिइएको हुनसक्ने आशंका व्यक्त गरेका छन्। नियुक्तिसम्बन्धी बैठकमा MCC, SPP जस्ता विषयको प्रसंग ल्याई दबाब र प्रभाव सिर्जना गरिएको उनको दाबी छ।

आफ्नै पार्टीबाट उपसभामुख भएर गएका व्यक्तिले वरियताको क्रम उल्लङ्घन गरी गरिएको निर्णयमा हस्ताक्षर गर्नु खेदपूर्ण भएको पनि उनले बताए।

श्रम संस्कृति पार्टीले विधि मिचेर राजनीति अघि बढाउने चलनको सदाका लागि विरोध गर्ने राईले स्पष्ट पारेका छन्।