नेपालमा विदेशी नागरिक दर्ता तथा अनुुगमन प्रणाली लागू गरिने

काठमाडौं, भदौ १७ । अध्यागमन विभागले नेपालमा प्रवेश गर्ने विदेशी नागरिकहरूको व्यवस्थापनलाई सहज र पारदर्शी बनाउन “विदेशी नागरिक दर्ता तथा अनुगमन प्रणाली लागू गर्ने भएको छ।

अध्यागमन ऐन २०१६ र नियमावली २०१७ बमोजिम, नेपाल प्रवेश गर्ने विदेशी नागरिकको आगमन, उपस्थिती र गतिविधि व्यवस्थापन गर्न विभागले यो प्रणाली विकास गरेको हो। यसले राष्ट्रिय सुरक्षा, आप्रवासन नियन्त्रण, पर्यटन प्रवद्र्धन र सुशासनमा सहयोग पुग्ने विभागको दाबी छ।

विभागका अनुसार, अन्तर्राष्ट्रिय कानुन र व्यवस्थापनका अन्तर्राष्ट्रिय प्रतिबद्धता पूरा गर्न तथा नेपालमा विदेशीहरूको बसोबास र गतिविधि सम्बन्धी तथ्यांक अभिलेखीकरण गर्न यस प्रणालीले महत्वपूर्ण भूमिका खेल्नेछ।

नयाँ प्रणाली २०८२ साल असोज १ गतेदेखि काठमाडौं उपत्यकाभित्रका तारे होटल, रिसोर्ट, गेस्ट हाउस, होमस्टे लगायतका आवास प्रदायक संस्थामा अनिवार्य रूपमा लागू हुनेछ। यस्ता संस्थाले आफ्ना आवासमा बस्ने विदेशी पाहुनाको विवरण अनिवार्य रूपमा सो प्रणालीमार्फत दर्ता गर्नुपर्नेछ।

अध्यागमन विभागले ७७ वटै जिल्लामा जिल्ला प्रशासन कार्यालयमार्फत पनि यस प्रणालीको कार्यान्वयन गरिने जनाएको छ। यसबारे थप जानकारीका लागि विभागको वेबसाइटमा उपलब्ध म्यानुअल अध्ययन गर्न सकिने व्यवस्था गरिएको छ।