नेपाली राजदूतावास अबुधाबीद्वारा श्रमिक अन्तरक्रिया

अबुधाबी, वैशाख २६ । नेपाली राजदूतावास अबुधाबीले नेपाली श्रमिकहरूसँग एक अन्तरक्रिया गर्दै
श्रमिकको हक, अधिकार, सुरक्षा, कम्पनीका नियम, वैदेशिक रोजगारीमा अपनाउनुपर्ने सावधानी, श्रम स्वीकृति नवीकरण, सामाजिक सुरक्षा कोषको प्रयोगलगायत विषयमा सचेत गराएकाे छ ।
संयुक्त अरब इमिरेट्स (युएई) का विभिन्न कम्पनीमा कार्यरत नेपाली श्रमिकहरूको उत्साहजनक उपस्थिति रहेको कार्यक्रममा राजदूतावासका श्रम सहचारी पंकज लाभ कर्णले श्रमिकको हक, अधिकार, सुरक्षा, कम्पनीका नियम, वैदेशिक रोजगारीमा अपनाउनुपर्ने सावधानी, श्रम स्वीकृति नवीकरण, सामाजिक सुरक्षा कोषको प्रयोगलगायत विषयमा अभिमुखीकरण गराए। उनले राहदानी, इमिरेट्स आइडी, लेबर कार्ड लगायतका कागजात सुरक्षित राख्न र साइबर अपराधबाट बच्न सचेत गराए।

यसैगरी, कन्सुलर सेवा विभागको अनलाइन पोर्टलमा उजुरी दिन आग्रह गर्दै उनले कम्पनी छोडेर नभाग्न र आपत्कालीन अवस्थामा राजदूतावास वा युएईको MOHRE सँग सम्पर्कमा रहन सुझाव दिए। कार्यक्रममा श्रमिकका विभिन्न जिज्ञासाको समेत सम्बोधन गरिएको थियो।

राजदूतावासका द्वितीय सचिव विमलेश कुमार मिश्रले राहदानी तथा कन्सुलर सेवासम्बन्धी प्रश्नहरूको जवाफ दिए। सहभागीहरूले न्यून पारिश्रमिक, श्रम मापदण्ड निर्धारण र नेपाली श्रमिकको सीप तथा योगदानको सम्मान गर्नुपर्ने सुझाव दिए। साथै, कार्यक्रममा प्राथमिक उपचारसम्बन्धी व्यावहारिक जानकारीसमेत प्रदान गरिएको थियो।

कार्यक्रममा नेपाली राजदूत लगायत कूटनीतिक कर्मचारीहरूको उपस्थिति रहेको थियो।