आजदेखि पेट्रोलियम पदार्थको मूल्य बृद्धि

काठमाडौँ, चैत २७ । नेपाल आयल निगम (नाआनि) ले अन्तर्राष्ट्रिय बजारमा पेट्रोलियम पदार्थको मूल्यवृद्धि तथा मध्यपूर्वमा जारी युद्धका कारण निगमलाई पाक्षिक ठूलो घाटा व्यहोर्नुपरेको जनाउँदै पेट्रोल, डिजेल, मट्टीतेल, एलपी ग्यास र हवाई इन्धनको खुद्रा बिक्री मूल्य बढाएकाे छ।

निगमका अनुसार आज बिहान ००:०१ बजेदेखि लागू हुने गरी पेट्रोलमा प्रति लिटर रु. १७, डिजेल/मट्टीतेलमा प्रति लिटर रु. २५, एलपी ग्यासमा प्रति सिलिन्डर रु. १०० र हवाई इन्धन (आन्तरिक) मा प्रति लिटर रु. ६ ले मूल्य वृद्धि गरिएको छ।

नयाँ मूल्यअनुसार पेट्रोलको मूल्य पहिलो वर्गमा रु. २१६.५०, दोस्रो वर्गमा रु. २१८.०० र तेस्रो वर्गमा रु. २१९.०० प्रतिलिटर कायम गरिएको छ। डिजेल/मट्टीतेल पहिलो वर्गमा रु. २०४.५०, दोस्रो वर्गमा रु. २०६.०० र तेस्रो वर्गमा रु. २०७.०० प्रतिलिटर पुगेको छ। एलपी ग्यास (१४.२ केजी) रु. २०१.०० र (७.१ केजी) रु. १००५ कायम गरिएको छ भने हवाई इन्धन (आन्तरिक) रु. २५७.०० प्रतिलिटर तोकिएको छ।

निगमले सरकारले भन्सार महसुल र पूर्वाधार विकास करमा ५० प्रतिशत छुट दिएपछि पनि पाक्षिक रु. १० अर्ब २१ करोड ९१ लाख घाटा हुने अवस्था रहेको बताएको थियो। मूल्य समायोजनपछि भने उक्त घाटा घटेर पाक्षिक रु. ७ अर्ब ८१ करोड पुगेको निगमको भनाइ छ।

निगमले अन्तर्राष्ट्रिय बजारमा तेलको मूल्य आकस्मिक रूपले बढेका कारण स्वचालित मूल्य प्रणालीअनुसार समायोजन हुन नसकेको उल्लेख गर्दै उपभोक्ता तथा सरोकारवालासँग सहयोग र पेट्रोलियम पदार्थमा मितव्ययिता अपनाउन आग्रह गरेको छ। यदि घाटा निरन्तर रहे इण्डियन आयल कर्पोरेसनलाई भुक्तानीमा असर पर्ने र आपूर्ति व्यवस्थापनमा समस्या आउने निगमको चेतावनी छ।
इजरायलर अमेरिका- इरान युद्धपछि निगमले याे तेस्रो पटक मूल्य वृद्धि गरेकाे हाे तर ग्यासमा भने पहिलाे पटक मूल्य वृद्धि गरेकाे हाे ।